സിസിഎഫിന്റെ വിവാദ നാട്ടാന സര്‍ക്കുലര്‍ തിരുത്തണമെന്ന് വനം വന്യജീവി വകുപ്പ് മന്ത്രി എ കെ ശശീന്ദ്രന്റെ നിര്‍ദേശം. തൃശൂര്‍ പൂരത്തില്‍ ആനകളുടെ എഴുന്നള്ളിപ്പില്‍ വിവിധ ദേവസ്വം ബോര്‍ഡുകള്‍ ഉത്കണ്ഠ വ്യക്തമാക്കിയ സാഹചര്യത്തിലാണ് തീരുമാനം. ചീഫ് വൈല്‍ഡ് ലൈഫ് വാര്‍ഡന്റെ സര്‍ക്കുലര്‍ തിരുത്താന്‍ എ കെ ശശീന്ദ്രൻ നിര്‍ദേശം നല്‍കി.
പൂരം എഴുന്നള്ളിപ്പില്‍ ആനയുടെ 50 മീറ്റര്‍ പരിധിയില്‍ താളമേളം ഉണ്ടാകാൻ പാടില്ലെന്ന നിര്‍ദേശം ഭേദഗതി ചെയ്യാനാണ് നീക്കം. ബന്ധപ്പെട്ടവരുമായി ചര്‍ച്ച നടത്തി പുതിയ സര്‍ക്കുലര്‍ പുറത്തിറക്കും. അപ്രായോഗിക നിര്‍ദേശങ്ങള്‍ തിരുത്തുന്നത് ഉള്‍പ്പെടെ ആനകളുടെ സംരക്ഷണവും ഉറപ്പുവരുത്തും. വിവാദമായ മറ്റ് നിര്‍ദേശങ്ങളിലും ചര്‍ച്ചയുണ്ടാകുമെന്ന് വനംവകുപ്പ് അറിയിച്ചു. സര്‍ക്കുലര്‍ വേഗത്തില്‍ തയ്യാറാക്കിയത് മൂലമാണ് അപ്രായോഗികമായ നിര്‍ദേശങ്ങള്‍ ഉള്‍പ്പെട്ടതെന്നാണ് വനംവകുപ്പ് ചൂണ്ടിക്കാട്ടുന്നത്.
