ഇക്കോ ലോഡ്ജ് ഇന്നുമുതൽ: ബുക്ക് ചെയ്യാം.
ചെറുതോണി : ഇടുക്കി അണക്കെട്ടിനു സമീപത്തായി നിർമാണം പൂർത്തീകരിച്ച ടൂറിസം വകുപ്പിന്റെ ഇക്കോ ലോഡ്ജുകൾ വ്യാഴാഴ്ച പൊതുജനങ്ങൾക്കായി തുറന്നുകൊടുക്കും. രാവിലെ 10-ന് മന്ത്രി റോഷി അഗസ്റ്റിന്റെ അധ്യക്ഷതയിൽ മന്ത്രി പി.എ. മുഹമ്മദ് റിയാസ് ഓൺലൈനായി ഉദ്ഘാടനംചെയ്യും.
പൊതുജനങ്ങൾ ഉൾപ്പെടെ എല്ലാവർക്കും ഇക്കോ ലോഡ്ജിലെ താമസസൗകര്യങ്ങൾ കാണുവാനുള്ള സൗകര്യങ്ങൾ വ്യാഴാഴ്ച ഉണ്ടായിരിക്കും.പൂർണമായും തടി ഏക്കറോളം വരുന്ന പ്രദേശത്താണ് ഇക്കോ ലോഡ്ജുകൾ നിർമിച്ചിരിക്കുന്നത്. പൂർണമായും തടികൊണ്ടാണു ലോഡ്ജുകളുടെ നിർമാണം. പദ്ധതിയുടെ നിർമാണത്തിനായിവിനിയോഗിച്ചത് 6.72 കോടി രൂപയാണ്. സംസ്ഥാനസർക്കാരിൽനിന്നും 2.78 കോടി രൂപയും കേന്ദ്രസർക്കാരിൽനിന്ന് (സ്വദേശ് ദർശൻ പദ്ധതി മുഖേന) 5.05 കോടി രൂപയ്ക്കാണു ഭരണാനുമതി ലഭിച്ചത്. 12 കോട്ടേജുകളാണ് ആകെയുള്ളത്. പ്രതിദിനം 4130 രൂപയാണ് ഈടാക്കുന്നത്. വിനോദസഞ്ചാരവകുപ്പിന്റെ വെബ് സൈറ്റായ www.keralatourism.org വഴി ഇക്കോ ലോഡ്ജ് ഓൺലൈനായി വ്യാഴാഴ്ച മുതൽ ബുക്കുചെയ്യാം.എറണാകുളത്തുനിന്നും തൊടുപുഴയിൽനിന്നും വരുന്നവർക്ക് ചെറുതോണിയിൽ നിന്ന് ഒന്നര കിലോമീറ്റർ മുൻപോട്ടു പ്രധാനപാതയിൽ സഞ്ചരിച്ചാൽ ഇവിടെയെത്താൻ സാധിക്കും.
കാഴ്ചകൾ ഒട്ടേറെ ലോഡ്ജിന്റെ പത്ത് കിലോമീറ്റർ ചുറ്റളവിനുള്ളിൽ സ്ഥിതിചെയ്യുന്ന ചെറുതോണി, ഇടുക്കി ഡാം, ഹിൽവ്യൂ പാർക്ക്, ഇടുക്കി ഡി.ടി.പി.സി. പാർക്ക്, കുടിയേറ്റസ്മാരക ടൂറിസം വില്ലേജ്, കാൽവരിമൗണ്ട് തുടങ്ങിയ ടൂറിസം കേന്ദ്രങ്ങളും സന്ദർശിക്കാനാകും.
