ചുഴലിക്കാറ്റിൽ ആടിയുലഞ്ഞ് ഇൻഫോപാർക്ക് മേഖല; പോസ്റ്റും മരവും വീണ് തകർന്നത് നിരവധി വാഹനങ്ങളും വീടുകളും
കാക്കനാട്: ഇൻഫോപാർക്ക് ഉൾപ്പെടുന്ന കാക്കനാട് മേഖലയിലുണ്ടായ ചുഴലിക്കാറ്റിൽ വ്യാപകനാശം. കനത്ത മഴയ്ക്കിടെയുണ്ടായ അതിശക്തമായ കാറ്റിൽ മരവും വൈദ്യുത പോസ്റ്റും വീണ് നിരവധി വാഹനങ്ങളും വീടുകളും തകർന്നു. വൈദ്യുത വിതരണവും ഗതാഗതവും താറുമാറായി. വെള്ളിയാഴ്ച വൈകിട്ടോടെയുണ്ടായ കാറ്റാണ് വ്യാപകനാശം വിതച്ചത്. സംഭവത്തിൻ്റെ ദൃശ്യങ്ങൾ സമൂഹമാധ്യമങ്ങളിൽ വൈറലാണ്.
തുതിയൂർ, ഇൻഫോപാർക്ക്, രാജഗിരി, ചിറ്റേത്തുകര മേഖലകളിലാണ് ചുഴലിക്കാറ്റ് ആഞ്ഞടിച്ചത്. ഇവിടങ്ങളിൽ മരം വീണ് വൈദ്യുതവിതരണം തടസപ്പെട്ടു. ഇൻഫോപാർക്ക് വളപ്പിൽ ചെറിയ മരങ്ങളും ഷീറ്റുകളും വീണ് ജീവനക്കാരുടെ വാഹനങ്ങൾക്ക് കേടുപാടുണ്ടായി.
ഇൻഫോപാർക്ക് - ബ്രഹ്മപുരം റോഡിൽ 11 കെവി വൈദ്യുത പോസ്റ്റും ലൈനും വാഹനങ്ങളുടെ മുകളിലേക്ക് പതിച്ചു. കെഎസ്ഇബി അധികൃതർ പെട്ടെന്ന് തന്നെ വൈദ്യുതി വിച്ഛേദിച്ചതോടെ അപകടം ഒഴിവാകുകയായിരുന്നു. ഇൻഫോപാർക്ക് റോഡിൻ മണിക്കൂറുകളോളം ഗതാഗതക്കുരുക്കു രൂക്ഷമായത് യാത്രക്കാരെ വലച്ചു. തുടർന്ന് ഫയർ ഫോഴ്സും പോലീസും നടത്തിയ പരിശ്രമത്തിനൊടുവിലാണ് ഗതാഗതം പുനസ്ഥാപിക്കാനായത്.
തുതിയൂരിൽ നിരവധി വീടുകൾക്കു മുകളിലേക്ക് മരം കടപുഴകി വീണു നാശനഷ്ടമുണ്ടായി. ശക്തമായ കാറ്റിനെ തുടർന്ന് ഇൻഫോപാർക്കിന് സമീപത്തെ ബെവ്കോ ഔട്ട്ലെറ്റിലും നാശമുണ്ടായിട്ടുണ്ട്. താഴത്തെ നിലയിൽ പ്രവർത്തിക്കുന്ന ഔട്ട്ലെറ്റിൻ്റെ ചില്ല് തകർന്നതോടെ കാറ്റ് അകത്തേക്ക് അടിച്ചുകയറി മദ്യക്കുപ്പികൾ വെച്ചിരുന്ന അലമാര മറിഞ്ഞുവീണു. കുപ്പിച്ചില്ലുകൾ തെറിച്ചുവീണ് മദ്യവാങ്ങാനെത്തിയ ചിലരുടെ കാലിന് പരിക്കേറ്റു.'
വില കൂടിയ 1000ത്തോളം മദ്യക്കുപ്പികളാണ് നശിച്ചത്. ഇതോടെ ബെവ്കോയ്ക്ക് ലക്ഷങ്ങളുടെ നാശനഷ്ടമുണ്ടായെന്നാണ് പ്രാഥമിക വിവരം. ഔട്ട്ലെറ്റിലേക്ക് കാറ്റ് അടിച്ചുകയറുന്നതിനു പിന്നാലെ മദ്യക്കുപ്പികൾ വെച്ചിരുന്ന അലമാര മറിഞ്ഞുവീഴുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.
