ഡൽഹി മാത്രമല്ല, പാകിസ്താൻ മുതൽ ബംഗാൾ ഉൾക്കടൽ വരെ വായൂമലിനീകരണം രൂക്ഷം; നാസയുടെ ഉപഗ്രഹചിത്രം പറയുന്നത് ഇങ്ങനെ
ന്യൂഡൽഹി: രാജ്യതലസ്ഥാനം വിഷപ്പുകയിൽപെട്ട് വലയുകയാണ്. നിലവിലെ സാഹചര്യം കണക്കിലെടുത്ത് ഗതാഗത നിയന്ത്രണങ്ങൾ, സ്കൂളുകൾക്ക് അവധി എന്നിങ്ങനെ വൻ ഒരുക്കങ്ങളാണ് ഡൽഹി സർക്കാർ നടത്തുന്നത്. അതേസമയം, ഡൽഹിയിൽ മാത്രമല്ല രാജ്യത്തിന്റെ ഒട്ടുമിക്ക പ്രദേശങ്ങളിലും വായൂമലിനീകരണം രൂക്ഷമായിരിക്കുന്നതായാണ് റിപ്പോർട്ട്.
നാസയുടെ ഒരു ഉപഗ്രഹ ചിത്രവും ഇന്ന് പുറത്തുവന്നിട്ടുണ്ട്. എന്നാൽ, പാകിസ്താൻ മുതൽ ബംഗാൾ ഉൾക്കടൽ വരെ നീണ്ടുകിടക്കുന്ന പ്രദേശങ്ങളിൽ വായൂ മോശം അവസ്ഥയിലാണുള്ളത് എന്നാണ് ഈ ഉപഗ്രഹ ചിത്രം സൂചന നൽകുന്നത്.
വായുവിന്റെ ഗുണനിലവാര സൂചിക ക്രമാതീതമായി ഉയരുന്നത് അയൽ സംസ്ഥാനങ്ങളിലെ വിളകൾ കത്തിക്കുന്നതിന്റെ ഫലമായാണ്. പ്രധാനമായും ഉത്തരേന്ത്യൻ സംസ്ഥാനങ്ങളിലാണ് മൂടൽമഞ്ഞ് രൂക്ഷമായിരിക്കുന്നത്. ശ്വാസകോശരോഗങ്ങളും മറ്റ് ആരോഗ്യപ്രശ്നങ്ങൾക്കും കാരണമാകുമെന്നാണ് ആരോഗ്യരംഗത്തെ വിദഗ്ദ്ധർ മുന്നറിയിപ്പ് നൽകുന്നത്.
ഒക്ടോബർ 29 മുതൽ വിളകൾക്ക് തീയിടുന്നത് കുത്തനെ ഉയർന്നുവെന്നാണ് നാസയുടെ വിവരങ്ങൾ സൂചിപ്പിക്കുന്നത്. ഒക്ടോബർ 29-ന് 1,068 കൃഷിയിടങ്ങളിൽ തീപിടിത്തം ഉണ്ടായതോടെ സംസ്ഥാനത്ത് 740 ശതമാനം വർധനയുണ്ടായിട്ടുണ്ടെന്നാണ് കണക്കുകൾ സൂചിപ്പിക്കുന്നത്. നിലവിലെ വിളവെടുപ്പ് സീസണിലെ ഏറ്റവും ഉയർന്ന കണക്കാണിത്. ഇതാണ് ഇത്രയധികം രൂക്ഷമാകുന്നതിന് കാരണമായിരിക്കുന്നത്.
ഇന്ന് രാവിലെ ചില പ്രദേശങ്ങളിൽ 500ന് മുകളിലാണ് വായു ഗുണനിലവാര സൂചിക ഇന്നുള്ളത്. ഈ സംഭവങ്ങളോടെ ലോകത്തിലെ തന്നെ ഏറ്റവും മോശം വായുവുള്ള നഗരങ്ങളുടെ പട്ടികയിൽ ഡൽഹിയും ഇടംപിടിച്ചിട്ടുണ്ട്.
മലിനീകരണ വിരുദ്ധ മാർഗ്ഗനിർദ്ദേശങ്ങളുടെ ഒരു സെറ്റായ ഗ്രേഡഡ് റെസ്‌പോൺസ് ആക്ഷൻ പ്ലാനിന്റെ (GRAP) ഘട്ടം 4 പ്രകാരം ദേശീയ തലസ്ഥാനത്ത് ഡീസൽ ട്രക്കുകളും മറ്റ് നിർമ്മാണ പ്രവർത്തനങ്ങളും നിരോധിച്ചിരിക്കുകയാണ്. അതിന് പുറമെ, സാധാരണയായി പതിവുള്ള ശീതകാല അവധി നേരത്തെയാക്കിയിട്ടുണ്ട്. നാളെ മുതൽ 18 വരെയാണ് സ്കൂളുകൾക്ക് വെക്കേഷൻ അനുവദിച്ചിരിക്കുന്നത്.
നേരത്തെ സുപ്രീം കോടതി സംസ്ഥാന സർക്കാരുകൾക്ക് നിർദ്ദേശങ്ങൾ നൽകിയിരുന്നു. ഡൽഹി, പഞ്ചാബ്, ഹരിയാന, ഉത്തർപ്രദേശ്, രാജസ്ഥാൻ എന്നീ സംസ്ഥാനങ്ങൾക്കാണ് പരിഹാരം കാണാൻ സുപ്രീം കോടതി നിർദ്ദേശിച്ചിട്ടുണ്ട്. കേന്ദ്ര സർക്കാരുമായി കൂടിയാലോചിച്ചതിന് ശേഷം സംസ്ഥാനങ്ങളോട് വിഷയത്തേക്കുറിച്ച് അന്വേഷിക്കാനാണ് നിർദ്ദേശിച്ചിരിക്കുന്നത്.
