ക്രൂഡോയിൽ ഉത്പാദനം കുറയ്ക്കാം; ഒപെക് പ്ലസിന് പിന്തുണയുമായി ഇറാഖ്; വിലയിൽ 2% വർധന
ക്രൂഡോയിൽ ഉത്പാദം താഴ്ത്താമെന്ന വാഗ്ദാനവുമായി ഇറാഖ് രംഗത്തെത്തി. അടുത്ത രണ്ടാഴ്ചയ്ക്കുള്ളിൽ നടക്കാനിരിക്കുന്ന, ലോകത്തെ പ്രധാന എണ്ണ ഉത്പാദക രാജ്യങ്ങളുടെ കൂട്ടായ്മയായ ഒപെക് പ്ലസിന്റെ നിർണായക യോഗത്തിന് മുന്നോടിയായാണ് ഇറാഖ് നിലപാട് വ്യക്തമാക്കിയിരിക്കുന്നത്. കമ്മോഡിറ്റി ഡെറിവേറ്റീവ് വിപണിയിൽ, ക്രൂഡോയിൽ ഫ്യൂച്ചർസ് കോൺട്രാക്ടുകളിൽ ചെയ്തിരുന്ന വമ്പൻ ഷോർട്ട് പൊസിഷനുകൾ കവർ ചെയ്തതും ഇതിനോട് ചേർത്തുവായിക്കാം.
എണ്ണ വിലയിൽ വർധന
ഡിസംബർ മാസം വരെ ഉത്പാദനം ചുരുക്കിയ നടപടി തുടരുമെന്ന് സൗദി അറേബ്യയും റഷ്യയും വ്യക്തമാക്കിയതിനു പിന്നാലെ ഇറാഖും സമാന നിലപാടിലേക്ക് വരുകയാണെന്ന സൂചന നൽകിയതോടെ ക്രൂഡോയിൽ വിലയിൽ രണ്ട് ശതമാനം വർധന രേഖപ്പെടുത്തി. ബ്രെന്റ് ക്രൂഡോയിൽ ഫ്യൂച്ചർസ് 1.42 ഡോളർ അഥവാ 1.8 ശതമാനം ഉയർന്ന് 81.43 ഡോളർ നിലവാരത്തിവും യുഎസ് ഡബ്ല്യുടിഐ ക്രൂഡോയിൽ ഫ്യൂച്ചർസ് 1.43 ഡോളർ അഥവാ 1.9 ശതമാനം വർധിച്ച് 77.17 ഡോളർ നിലവാരത്തിലുമാണ് വെള്ളിയാഴ്ച ക്ലോസ് ചെയ്തത്.ഇതോടെ ആഴ്ച കാലയളവിൽ നാല് ശതമാനം നഷ്ടം രേഖപ്പെടുത്തിയാണ് ക്രൂഡോയിൽ ഫ്യൂച്ചർസ് കോൺട്രാക്ട് വ്യാപാരം അവസാനിപ്പിച്ചിരിക്കുന്നത്.
തുടർച്ചയായ മൂന്നാം ആഴ്ചയാണ് ക്രൂഡോയിലിൽ തിരുത്തൽ നേരിടുന്നത്. 2023 ഏപ്രിൽ അവസാന ആഴ്ചകളിലും മേയ് മാസമാദ്യം വരെയും നീണ്ടുനിന്ന തിരിച്ചടിക്ക് ശേഷം ക്രൂഡോയിൽ ഫ്യൂച്ചർസിൽ തുടർച്ചയായി ഇത്രയുമധികം തിരുത്തൽ സംഭവിക്കുന്നത് ഇപ്പോഴാണ്.രാജ്യത്തെ വാഹന ഇന്ധന നിരക്കുകളിൽ ശനിയാഴ്ച കാര്യമായ മാറ്റമൊന്നും റിപ്പോർട്ട് ചെയ്തിട്ടില്ല. ഡൽഹിയിൽ ഒരു ലിറ്റർ പെട്രോളിന്റെ നിരക്ക് 96.72 രൂപയും ഡീസൽ വില 89.62 രൂപയായും മാറ്റമില്ലാതെ തുടരുന്നു.
മുംബൈ നഗരത്തിൽ പെട്രോളിന്റെ വില 106.31 രൂപയും ഡീസൽ നിരക്ക് 94.27 രൂപയിലും നിൽക്കുന്നു. കൊൽക്കത്തയിൽ ഒരു ലിറ്റർ പെട്രോളിന്റെ വില 106.03 രൂപയും ഡീസൽ നിരക്ക് 92.76 രൂപയായും തുടരുന്നു. ചെന്നൈ നഗരത്തിൽ പെട്രോൾ നിരക്ക് 102.63 രൂപയും ഡീസൽ വില 94.24 രൂപയിലും നിൽക്കുന്നു.അതുപോലെ കേരളത്തിലെ പെട്രോൾ, ഡീസൽ നിരക്കുകളിലും ഇന്ന് മാറ്റങ്ങളൊന്നും രേഖപ്പെടുത്തിയിട്ടില്ല. തിരുവനന്തപുരം നഗരത്തി ഒരു ലിറ്റർ പെട്രോളിന്റെ വില 109.73 രൂപയും ഡീസൽ വില 98.53 രൂപ നിലവാരത്തിലും മാറ്റമില്ലാതെ നിൽക്കുന്നു. കൊച്ചി നഗരത്തിൽ പെട്രോൾ വില 107.78 രൂപയും ഡീസൽ നിരക്ക് 96.70 രൂപയിലും തുടരുന്നു. കോഴിക്കോട് നഗരപരിധിയിൽ ഒരു ലിറ്റർ പെട്രോളിന്റെ നിരക്ക് 108.28 രൂപയും ഡീസൽ നിരക്ക് 97.20 രൂപയായും മാറ്റമില്ലാതെ തുടരുന്നു.
