ഫ്രഷ് കറ്റാര്‍വാഴ മുഖത്ത്‌പുരട്ടാറുണ്ടോ, സൂക്ഷിച്ചില്ലെങ്കില്‍.....
പണ്ടുകാലത്ത് അധികം ആളുകള്‍ക്ക് അറിയാതിരുന്ന സൗന്ദര്യ, ആരോഗ്യ, മുടി സരംക്ഷണ വഴിയാണ് കറ്റാര്‍വാഴ എന്നത്. ഏറെ ഗുണങ്ങള്‍ അടങ്ങിയ ഒന്ന് തന്നെയാണിതെന്നത് വാസ്തവവുമാണ്. എന്നാല്‍ ഇത് വേണ്ട രീതിയില്‍ അല്ല ഉപയോഗിയ്ക്കുന്നതെങ്കില്‍ ദോഷങ്ങളുണ്ടാകുമെന്നതും വാസ്തവമാണ്. ഇതു പോലെ തന്നെ കൂടുതല്‍ ഇത് ചര്‍മത്തില്‍ ഉപയോഗിയ്ക്കുമ്പോഴും ചില ദോഷങ്ങളുണ്ടാകുന്നു.
മുഖക്കുരു
കററാര്‍ വാഴയ്ക്ക് സ്വാഭാവിക എണ്ണമയമുണ്ട്. ഇതിനാല്‍ തന്നെ ഇത് കൂടുതലായി ഉപയോഗിയ്ക്കുന്നത് എണ്ണമയമുള്ള ചര്‍മത്തിന് ചിലപ്പോള്‍ ദോഷം വരുത്തുകയും ചെയ്യുന്നു. ഇത് മുഖക്കുരു പോലുള്ള പ്രശ്‌നങ്ങള്‍ വരുത്താന്‍ കാരണമാകുന്നു. പ്രത്യേകിച്ചും മഴക്കാലമെങ്കില്‍ ഇത്തരം പ്രശ്‌നത്തിന് സാധ്യതയേറെയാണ്. എന്നാല്‍ വരണ്ട ചര്‍മമുള്ളവര്‍ക്ക് കറ്റാര്‍വാഴ ആശ്രയിക്കാവുന്ന നല്ലൊന്നാന്തരം വഴിയുമാണ്.
കറ്റാര്‍ വാഴ ജെല്‍ ഉപയോഗിയ്ക്കുമ്പോള്‍
കറ്റാര്‍ വാഴ ജെല്‍ ഉപയോഗിയ്ക്കുമ്പോള്‍ ഇത് കൃത്യമായ രീതിയില്‍ ഉപയോഗിയ്ക്കുന്നുവെന്ന് ഉറപ്പാക്കുക. പ്രത്യേകിച്ചും ഫ്രഷ് ജെല്‍ ഉപയോഗിയ്ക്കുമ്പോള്‍. കറ്റാര്‍ വാഴത്തണ്ട് ഒടിച്ചെടുത്ത് കഴിഞ്ഞാല്‍ ഇത് അല്‍പനേരം ഒരു ട്രേയില്‍ വയ്ക്കുക. ഇതിലെ മഞ്ഞനിറത്തിലെ ദ്രാവകം പോയ ശേഷം മാത്രം ഇതിന്റെ ജെല്‍ ഉപയോഗിയ്ക്കുക. ഇതുപോലെ ഇതിന്റെ തണ്ടോട് ചേര്‍ന്ന് ഭാഗത്താണ് ഈ ജെല്‍ കൂടുതലായി കാണപ്പെടുന്നത്. ഈ ഭാഗം ഒഴിവാക്കി കറ്റാര്‍വാഴ മുറിച്ചെടുത്ത് ഉപയോഗിയ്ക്കാം.
ചര്‍മത്തിന്
പലരും കൂടുതല്‍ ഗുണത്തിനായി ചെടിയില്‍ നിന്നും നേരിട്ടാണ് ജെല്‍ എടുക്കുന്നത്. ഈ സമയത്ത് ഇതിലെ തണ്ടോട് ചേര്‍ന്ന മഞ്ഞ നിറത്തിലെ ദ്രാവകവും ഇതിനൊപ്പം പോരാറുണ്ട്. ഈ ലാറ്റെക്‌സ് വാസ്തവത്തില്‍ ചര്‍മത്തിന് അലര്‍ജിയുണ്ടാക്കുന്ന ഒന്നാണ്. ചര്‍മത്തിന് ചൊറിച്ചിലും അസ്വസ്ഥതയുമെല്ലാമുണ്ടാകും. ഇതിനാല്‍ തന്നെ ഫ്രഷ് ജെല്‍ ഉപയോഗിയ്ക്കുന്നവര്‍ ഈ മഞ്ഞ നിറത്തിലെ പശ നീക്കിയെന്ന് ഉറപ്പാക്കിയ ശേഷം മാത്രം ഇത് ഉപയോഗിയ്ക്കുകയെന്നത് ഏറെ പ്രധാനമാണ്. ഇത് നല്ലതുപോലെ കഴുകിക്കളയുകയും ചെയ്യാം.
പാച്ച് ടെസ്റ്റ്
കറ്റാര്‍വാഴ മുഖത്തും ചര്‍മത്തിലും നേരിട്ട് പ്രയോഗിയ്ക്കുന്നതിനേക്കാള്‍ മുന്‍പായി പാച്ച് ടെസ്റ്റ് നടത്തുകയെന്നത് ഏറെ പ്രധാനമാണ്. ചര്‍മത്തില്‍ ചൊറിച്ചിലോ ചുവപ്പോ എരിച്ചിലോ അനുഭവപ്പെടുന്നുവെങ്കില്‍ ഇത് നിങ്ങള്‍ക്ക് അലര്‍ജിയുണ്ടാക്കുന്നുവെന്നതിന്റെ സൂചനയാണ്. ഇത് ഉപയോഗിയ്ക്കാതിരിയ്ക്കുന്നതാണ് നല്ലത്. അല്ലെങ്കില്‍ മറ്റേതെങ്കിലും ഫേസ്പായ്ക്കിനൊപ്പം ഉപയോഗിയ്ക്കാം. ചിലര്‍ക്ക് ഫ്രഷ് ജെല്‍ ആണ് ഇത്തരം പ്രശ്‌നമുണ്ടാക്കുക. ഇവര്‍ക്ക് ഇത് വാങ്ങുന്ന ജെല്ലില്‍ ചേര്‍ത്തിളക്കി ഉപയോഗിയ്ക്കാം. പ്രശ്‌നം കൂടുതലായി ഉണ്ടാകില്ല. ഇതല്ലെങ്കില്‍ വാങ്ങുന്ന ജെല്‍ ഉപയോഗിയ്ക്കാം.
