ഇതാ കേരള ബ്ലാസ്റ്റേഴ്സിന്റെ കിടിലൻ തിരിച്ചുവരവ്; വമ്പന്മാരെ വീഴ്ത്തി ഞെട്ടിച്ചു, ആവേശത്തിൽ ആരാധകർ
യുഎഇ പ്രീ സീസണിലെ രണ്ടാം സൗഹൃദ മത്സരത്തിൽ പ്രോ ലീഗ് ക്ലബ്ബായ ഷാർജ എഫ്സിയെ (Sharjah FC) വീഴ്ത്തി ഞെട്ടിച്ച് കേരള ബ്ലാസ്റ്റേഴ്സ് എഫ്സി (Kerala Blasters FC). കരുത്തരായ ഷാർജക്കെതിരെ ഒന്നിനെതിരെ രണ്ട് ഗോളുകൾക്കാണ് മഞ്ഞപ്പടയുടെ വിജയം. കളിയുടെ ആദ്യ പകുതിയിൽ ജാപ്പനീസ് താരം ഡൈസുകെ സകായും (Daisuke Sakai), ഘാന താരം ഖ്വാമ പെപ്രയുമാണ് കേരള ബ്ലാസ്റ്റേഴ്സിനായി വല കുലുക്കിയത്. ഇതിൽ കിടിലൻ ഫ്രീ കിക്കിലൂടെയായിരുന്നു സകായുടെ ഗോൾ പിറന്നത്. ബോക്സിന് തൊട്ടുവെളിയിൽ വെച്ചുലഭിച്ച ഫ്രീ കിക്ക് മനോഹരമായി ജപ്പാൻ താരം വലയിലെത്തിക്കുകയായിരുന്നു.
ക്രൊയേഷ്യൻ താരം മാർകോ ലെസ്കോവിച്ചായിരുന്നു (Marko Leskovic) തുടക്കം കേരള ബ്ലാസ്റ്റേഴ്സിനെ നയിച്ചത്. നേരത്തെ ആദ്യ മത്സരത്തിൽ കനത്ത പരാജയം ഏറ്റുവാങ്ങിയിരുന്ന മഞ്ഞപ്പട ആരാധകർക്ക് വലിയ ആവേശം സമ്മാനിക്കുന്നതാണ് ഷാർജ എഫ്സിക്കെതിരായ വിജയം. ആദ്യ മത്സരത്തിൽ കാണികൾക്ക് പ്രവേശനമുണ്ടായിരുന്നെങ്കിലും അടച്ചിട്ട സ്റ്റേഡിയത്തിലാണ് ഷാർജയ്ക്കെതിരായ പോരാട്ടം നടന്നത്.
ഷാർജ എഫ്സിക്കെതിരെ കേരള ബ്ലാസ്റ്റേഴ്സ് അണിനിരത്തിയ സ്റ്റാർട്ടിങ് ഇലവൻ ഇങ്ങനെ: സച്ചിൻ സുരേഷ് (ഗോൾകീപ്പർ), പ്രബീർ ദാസ്, മിലോസ് ഡ്രിൻസിച്ച്, മാർകോ ലെസ്കോവിച്ച്, ഐബാൻ ഡോഹ്ലിങ്, ഡാനിഷ് ഫാറൂഖ്, അസർ, നിഹാൽ സുധീഷ്, മൊഹമ്മദ് ഐമൻ, ഡൈസുകെ സകായ്, ഖ്വാമെ പെപ്ര.
നേരത്തെ യുഎഇയിൽ കളിച്ച ആദ്യ സൗഹൃദ മത്സരത്തിൽ ദയനീയ പരാജയമായിരുന്നു കേരള ബ്ലാസ്റ്റേഴ്സ് നേരിട്ടത്. യുഎഇ പ്രോ ലീഗ് ക്ലബ്ബായ അൽ വാസൽ എഫ്സി മറുപടിയില്ലാത്ത ആറ് ഗോളുകൾക്ക് മഞ്ഞപ്പടയെ തകർക്കുകയായിരുന്നു. ദയനീയ പരാജയത്തിന്റെ നിരാശയിൽ നിന്ന് പുറത്തുകടക്കാൻ ഷാർജ എഫ്സിക്കെതിരായ മത്സരഫലം ഒരുപരിധി വരെ കേരള ബ്ലാസ്റ്റേഴ്സിനെ സഹായിക്കും. ഇനി ഒരു സൗഹൃദ മത്സരം കൂടി യുഎഇയിൽ കേരള ബ്ലാസ്റ്റേഴ്സ് കളിക്കും. സെപ്റ്റംബർ 15 ന് നടക്കാനിരിക്കുന്ന ഈ പോരാട്ടത്തിൽ കരുത്തരായ ഷബബ് അൽ അഹ്ലിയാണ് കേരള ബ്ലാസ്റ്റേഴ്സിന്റെ എതിരാളികൾ. കഴിഞ്ഞ സീസണിൽ യുഎഇ പ്രോ ലീഗിലെ ചാമ്പ്യന്മാരാണ് അൽ ഷബബ്. അവർക്കെതിരായ മത്സരം കേരള ബ്ലാസ്റ്റേഴ്സിന് വലിയ പരീക്ഷണം തന്നെയായിരിക്കും.
അതേ സമയം തങ്ങളുടെ ആദ്യ ഇന്ത്യൻ സൂപ്പർ ലീഗ് കിരീടമാണ് 2023-24 സീസണിൽ കേരള ബ്ലാസ്റ്റേഴ്സ് ലക്ഷ്യമിടുന്നത്. കഴിഞ്ഞ രണ്ട് സീസണുകളിലും പ്ലേ ഓഫിലെത്താൻ ടീമിന് സാധിച്ചിരുന്നു. സെപ്റ്റംബർ 21 ന് നടക്കാനിരിക്കുന്ന പത്താം സീസൺ ഐഎസ്എല്ലിന്റെ ഉദ്ഘാടന മത്സരത്തിൽ കേരള ബ്ലാസ്റ്റേഴ്സ് കളിക്കാനിറങ്ങുന്നുണ്ട്. കൊച്ചിയിലെ ജവഹർലാൽ നെഹ്‌റു അന്താരാഷ്ട്ര സ്റ്റേഡിയത്തിൽ ബദ്ധവൈരികളായ ബംഗളൂരു എഫ്സിയെയാണ് ഈ മത്സരത്തിൽ മഞ്ഞപ്പട നേരിടുന്നത്. ഈ കളിക്കുള്ള ടിക്കറ്റുകൾ ചൂടപ്പം പോലെയാണ് വിറ്റുപോകുന്നത്.
2023-24 സീസണിലെ ആദ്യ ടൂർണമെന്റായ ഡ്യൂറൻഡ് കപ്പിൽ നേരത്തെ കേരള ബ്ലാസ്റ്റേഴ്സിന് മികവുകാട്ടാനായിരുന്നില്ല. കൊൽക്കത്തയിൽ നടന്ന ടൂർണമെന്റിൽ മഞ്ഞപ്പട ആദ്യ റൗണ്ടിൽത്തന്നെ പുറത്തായി. കേരളത്തിൽ നിന്നുള്ള ഐ ലീഗ് ടീമായ ഗോകുലം കേരളയോട് പരാജയപ്പെട്ട മഞ്ഞപ്പടയ്ക്ക് ബംഗളൂരു എഫ്സിയുടെ റിസർവ് ടീമിനോടും വിജയിക്കാനായില്ല. ഇന്ത്യൻ എയർഫോഴ്സിനെ അവസാന ഗ്രൂപ്പ് മത്സരത്തിൽ തകർത്തതുമാത്രമാണ് ഡ്യൂറൻഡ് കപ്പിൽ ഇക്കുറി കേരള ബ്ലാസ്റ്റേഴ്സിന് ആകെ എടുത്തുപറയാനുള്ളത്‌. എന്നാൽ ഈ ക്ഷീണമെല്ലാം കൊമ്പന്മാർ ഇന്ത്യൻ സൂപ്പർ ലീഗിൽ തീർക്കുമെന്ന പ്രതീക്ഷയിലാണ് ഇപ്പോൾ ആരാധകർ.
