ക്രൂഡോയിൽ വിലയിൽ നേരിയ തിരുത്തൽ; ഇന്ത്യയുടെ കറന്റ് അക്കൗണ്ട് കമ്മിയിൽ ആശങ്ക
ക്രൂഡോയിൽ വിലയിൽ നേരിയ ഇടിവ്. 10 മാസക്കാലയളവിലെ ഉയർന്ന നിലവാരത്തിലേക്ക് വില എത്തിയതിനെ തുടർന്ന് ക്രൂഡോയിൽ ഫ്യൂച്ചർസ് കോൺട്രാക്ടുകളിൽ നിന്നും ട്രേഡർമാർ ലാഭമെടുപ്പിന് തുനിഞ്ഞതാണ് കാരണം. സൗദി അറേബ്യയും റഷ്യയും വിപണിയിലേക്കുള്ള ക്രൂഡോയിൽ വിതരണം വെട്ടിക്കുറച്ച നടപടി ഡിസംബർ വരെ നീട്ടിയതാണ് ക്രൂഡോയിൽ വില കുതിച്ചുയരുന്നതിലേക്ക് വഴിതെളിച്ചത്.
ഇന്നലത്തെ വ്യാപാരത്തിനൊടുവിൽ ബ്രെന്റ് ക്രൂഡോയിൽ ഫ്യൂച്ചർസ് 0.1 ശതമാനം താഴ്ന്ന് 94.34 ഡോളറിലും യുഎസ് ഡബ്ല്യുടിഐ ക്രൂഡോയിൽ ഫ്യൂച്ചർസ് 0.3 ശതമാനം നഷ്ടത്തോടെ 91.20 ഡോളർ നിലവാരത്തിലുമാണ് ക്ലോസ് ചെയ്തത്. ചൊവ്വാഴ്ചത്തെ വ്യാപാരത്തിനിടെ ഒരു ഘട്ടത്തിൽ ബ്രെന്റ് ക്രൂഡോയിൽ വില 95 ഡോളർ നിലവാരം മറികടന്നിരുന്നു. 2022 നവംബറിനു ശേഷം രേഖപ്പെടുത്തുന്ന ഉയർന്ന വില നിലവാരവുമാണിത്.
കറന്റ് അക്കൗണ്ട് കമ്മി
രാജ്യാന്തര വിപണിയിൽ ക്രൂഡോയിൽ വില കുത്തനെ ഉയർന്നതോടെ, ഒരിടവേളയ്ക്കുശേഷം രാജ്യത്തിന്റെ കറന്റ് അക്കൗണ്ട് കമ്മിയെ (Current Account Deficit) കുറിച്ചുള്ള ആശങ്കയും തലപൊക്കിത്തുടങ്ങി. ലോകത്തെ മൂന്നാമത്തെ വലിയ ക്രൂഡോയിൽ ഉപഭോക്താവിനെ സംബന്ധിച്ചിടത്തോളം, ക്രൂഡോയിലിന്റെ വിലവ്യതിയാനം ഏറെ നിർണായക ഘടകമാണ്. ഒരുവശത്ത് കയറ്റുമതിയിൽ ഇടിവ് പ്രകടമാകുന്നതിനൊപ്പം ക്രൂഡോയിൽ വില വർധിക്കുന്നതുമാണ് തിരിച്ചടിയാകുന്നത്. ഈ വർഷമാദ്യം ക്രൂഡോയിൽ വില 70 ഡോളർ നിലവാരത്തിലേക്ക് കൂപ്പുകുത്തിയിരുന്നെങ്കിലും ഇപ്പോൾ 90 ഡോളർ നിലവാരത്തിനു മുകളിലാണ് വ്യാപാരം പുരോഗമിക്കുന്നത്.
പെട്രോൾ, ഡീസൽ നിരക്ക്
ജൂൺ മാസത്തിനു ശേഷമുളള കാലയളവിൽ 30 ശതമാനിലധം മുന്നേറ്റമാണ് ക്രൂഡോയിൽ വിലയിൽ രേഖപ്പെടുത്തിയത്. 70 ഡോളർ നിലവാരത്തിൽ നിന്നിരുന്ന ക്രൂഡോയിൽ വില 94 ഡോളർ മറികടന്നെങ്കിലും രാജ്യത്തെ പെട്രോൾ, ഡീസൽ വിലകൾ വർധിപ്പിക്കാൻ കേന്ദ്രസർക്കാർ തയ്യാറായിട്ടില്ലെന്നത് ശ്രദ്ധേയമാണ്. പണപ്പെരുപ്പം വരുതിയിലാകുന്ന ഘട്ടത്തിൽ ഇന്ധനവില വർധിപ്പിക്കുന്നത് തിരിച്ചടിയാകുമെന്ന വിലയിരുത്തലാണ് കാരണം.
ബുധനാഴ്ചയും രാജ്യത്തെ പ്രധാന മെട്രോ നഗരങ്ങളിലെ ഇന്ധന നിരക്കുകളിൽ മാറ്റമില്ല. ഡൽഹിയിൽ ഒരു ലിറ്റർ പെട്രോളിന് 96.72 രൂപയും ഡീസൽ നിരക്ക് 89.62 രൂപ നിലവാരത്തിലും മാറ്റമില്ലാതെ തുടരുന്നു. മുംബൈയിൽ പെട്രോളിന്റെ വില 106.31 രൂപയും ഡീസൽ നിരക്ക് 94.27 രൂപയായും നിൽക്കുന്നു. കൊൽക്കത്തയിൽ ഒരു ലിറ്റർ പെട്രോളിന്റെ വില 106.03 രൂപയും ഡീസൽ വില 92.76 രൂപയായും കുറിച്ചു. ചെന്നൈ നഗരപരിധിയിൽ പെട്രോളിന്റെ നിരക്ക് 102.63 രൂപയും ഡീസൽ വില 94.24 രൂപയായും മാറ്റമില്ലാതെ തുടരുന്നു.
അതുപോലെ സംസ്ഥാനത്തെ ഇന്ധന നിരക്കുകളിലും ഇന്ന് കാര്യമായ മാറ്റമൊന്നും റിപ്പോർട്ട് ചെയ്തിട്ടില്ല. തിരുവനന്തപുരം ജില്ലയിൽ ഒരു ലിറ്റർ പെട്രോളിന്റെ നിരക്ക് 109.73 രൂപയും ഡീസൽ നിരക്ക് 98.53 രൂപയായും നിൽക്കുന്നു. കൊച്ചി നഗരപരിധിയിൽ പെട്രോളിന്റെ നിരക്ക് 107.78 രൂപയും ഡീസൽ നിരക്ക് 96.70 രൂപയിലും മാറ്റമില്ലാതെ തുടരുന്നു. കോഴിക്കോട് നഗരത്തിൽ ഒരു ലിറ്റർ പെട്രോളിന്റെ നിരക്ക് 108.28 രൂപയും ഡീസൽ വില 97.20 രൂപയായും നിൽക്കുന്നു.
