ആദ്യ ഹൈഡ്രജൻ പമ്പ് അടുത്ത വർഷം തുറക്കും: ഒമാൻ
ഒമാനിൽ ആദ്യ ഹൈഡ്രജൻ പമ്പ് അടുത്ത വർഷം തുറക്കും. ഹൈഡ്രജൻ ഇന്ധനം നിറക്കുന്ന സ്റ്റേഷൻ രൂപകൽപന ചെയ്യുന്നതിനും വികസിപ്പിക്കുന്നതിനും വേണ്ട പ്രവർത്തനങ്ങൾ തുടങ്ങും. സൗദി അറേബ്യ ആസ്ഥാനമായുള്ള ഹൈഡ്രജൻ സാങ്കേതിക മേഖലയിലെ കമ്പനിയുമായി കരാറിലെത്തി. എൻജിനീയറിങ്, സംഭരണം, ഗുണനിലവാരം, നിയന്ത്രണം, വിതരണം എന്നിവ ഇതിന്റെ ഭാഗമായി നടക്കും. ഹൈഡ്രജൻ സിസ്റ്റംസിന്‍റെ ചുമതലയായിരിക്കും പ്രവർത്തനങ്ങൾ നടക്കുന്നത്.
ഒമാൻ എയർപോർട്ട് ഷെല്ലിന്റെ ഗ്രീൻ ഹൈഡ്രജൻ ഫോർ മൊബിലിറ്റി പദ്ധതിക്കായി ഭൂമി അനുവദിച്ചിരുന്നു. മസ്കത്ത് ഇന്റർനാഷനൽ എയർപോർട്ടിന് സമീപത്തുള്ള ഭൂമിയാണ് പദ്ധതിക്കായി അനുവദിച്ചിരിക്കുന്നത്. സിവിൽ ഏവിയേഷൻ അതോറിറ്റിയുടെ ഉടമസ്ഥതയിലായിരിക്കും പദ്ദതിയുടെ പ്രവർത്തനങ്ങൾ നടക്കുന്നത്.
അതേസമയം, ഒമാനിൽ മൊബൈൽ ഉപയോക്താക്കളുടെ എണ്ണത്തിൽ വലിയ വർധനവാണ് ഉണ്ടായിരിക്കുന്നത്. നാഷനൽ സെന്റർ ഫോർ സ്റ്റാറ്റിസ്റ്റിക്‌സ് ആൻഡ് ഇൻഫർമേഷനാണ് ഇതുമായി ബന്ധപ്പെട്ട കണക്കുകൾ പുറത്തുവിട്ടത്. ഈ വർഷം ജൂൺ വരെയുള്ള കണക്കുകളാണ് പുറത്തുവിട്ടിരിക്കുന്നത്. ഇതിലാണ് മൊബൈൽ ഫോൺ ഉപയോക്താക്കൾ 12.4 ശതമാനം വർധിച്ചതായി കാണുന്നത്. രാജ്യത്തെ ഉപയോക്താക്കളുടെ എണ്ണം നിലവിൽ 70.2 ലക്ഷമാണ്. ഇതിൽ ഭൂരിഭാഗവും പ്രീ-പെയ്ഡ് സബ്‌സ്‌ക്രിപ്‌ഷനുകളാണ്. പ്രീ പെയ്ഡ് കണക്ഷനുകളിൽ ജൂൺവരെയുള്ള കണക്കുകൾ നോക്കുമ്പോൾ 10 ശതമാനത്തിന്റെ വളർച്ചയാണ് ഉണ്ടായിരിക്കുന്നത്.
മൊബൈൽ ബ്രോഡ്‌ബാൻഡ് ഇന്റർനെറ്റ് സബ്‌സ്‌ക്രിപ്‌ഷനുകളുടെ എണ്ണത്തിലും വളർച്ച രേഖപ്പെടുത്തിയിട്ടുണ്ട്. ആകെ ഇന്റർനെറ്റ് കണക്ഷനുകളുടെ എണ്ണം 59.3 ലക്ഷമാണ്. മൊബൈൽ ബ്രോഡ്‌ബാൻഡ് ഇന്റർനെറ്റ് സബ്‌സ്‌ക്രിപ്‌ഷനുകളുടെ വളർച്ചനിരക്ക് 7.4 ശതമാണ് ഇപ്പോഴുള്ളത്. മൊബൈൽ ടെക്നോളജി ഉപയോഗം ഒമാനിൽ തുടർച്ചയായി വളരുകയാണ് ചെയ്യുന്നത്. ഒമാനിൽ 3ജി മൊബൈൽ സേവനങ്ങൾ അവസാനിപ്പിക്കാൻ ഒരുങ്ങുകയാണ് മുഴുവൻ ആയും 5ജിലേക്ക് മാറാൻ ആണ് തീരുമാനിച്ചിരിക്കുന്നത്. ടെലികമ്യൂണിക്കേഷൻ സേവനങ്ങളുടെ ഗുണനിലവാരം മെച്ചപ്പെടുത്താൻ വേണ്ടി പുതിയ പദ്ധതികൾ ആണ് കൊണ്ടുവരുന്നത്. അതിവേഗ ഇന്റർനെറ്റ് സംവിധാനം പെട്ടെന്ന് നടപ്പിലാക്കാൻ വേണ്ടിയുള്ള നടപടികൾ സ്വീകരിച്ചുവരുകയാണെന്ന് അധികൃതർ അറിയിച്ചു.
