കോഴിക്കോട് : നല്ല ബിരിയാണിക്ക് വേണ്ടി ഏതറ്റം വരെ പോകാനും ഭക്ഷണപ്രേമികള്‍ തയ്യാറാണ്. അത്തരത്തിലുളള രുചിപ്പെരുമ കടലും കടക്കും. അതിനൊരു ഉദാഹരണമാണ് കോഴിക്കോട് പാരഗണിലെ ബിരിയാണി. ഒരിക്കലെങ്കിലും രുചിച്ചു നോക്കാൻ ആരും ആഗ്രഹിക്കുന്ന തരത്തിലാണ് ബിരിയാണിയുടെ രുചി. എന്നാൽ ആ പ്രസിദ്ധി ഇപ്പോൾ രാജ്യാന്തര തലത്തിലും എത്തിയിരിക്കുകയാണ്. ട്രാവല്‍ ഓണ്‍ലൈന്‍ ഗൈഡായ ടേസ്റ്റ് അറ്റ്‌ലസ് പുറത്തുവിട്ട ലോകത്തെ 150 ഐതിഹാസിക റസ്റ്ററന്റുകളുടെ പട്ടികയില്‍ ഇടംപിടിച്ചിരിക്കുകയാണ് പാരഗൺ.
ലോകത്തെ തന്നെ ഏറ്റവും മികച്ച 150 റെസ്റ്റോറന്റുകളുടെ പട്ടികയില്‍ ഏഴ് ഇന്ത്യന്‍ റെസ്റ്റോറന്റുകളും ഇടം നേടിയിട്ടുണ്ട്. പാരഗണിലെ ഐക്കോണിക് വിഭവമായി തിരഞ്ഞെടുത്തിരിക്കുന്നത് ഏവരും ഇഷ്ടപ്പെടുന്ന ബിരിയാണിയെയാണ്. കോഴിക്കോട്ടുള്ള പാരഗണ്‍, പരമ്പരാഗത മലബാര്‍ പാചകരീതിയുടെ വൈദഗ്ധ്യത്തിന് പ്രോത്സാഹിപ്പിക്കുന്ന റെസ്‌റ്റോറന്റാണെന്നാണ് വെബ്സൈറ്റ് പറയുന്നത്.
